2016. aastak seto käsitüüh om olnu kipõ nigu seto naase elo (0)

Näpotüü teema-aastast oll´ timahava vällä hõigat rahvarõivas: tuust sai algusõ ka kuningapäävä võistlusõ teema „Seto hamõh“ ja aastaga näütüs Talinah „Hammõ sisse minek“. Peeti mõnõ’ teemapäävä’ rahvarõividõ tegemisõst ja säeti tsihte seto rahvarõivaraamadu kokkosäädmisõ kotsilõ.

Verska Kirävüül ja Seto Käsitüü Kogol sai timahava täüs 10 aastakka tegevüst. No’ võimõ üldä’, õt käsitüü and leibä jo pall´osilõ ja mõni tiin eiski vorsti leevä pääle. S´oo aastaga oll´ mitmit joba traditsioonist saanu tegemisi: Seto Pitsi päävä’, Kostipäävä kõrraldaminõ, Seto Pitsi klubi kuuhkäüminõ. Vahtsõ märgotusõna peeti Suurt Pitsipäivä, Setomaa külli käsitüüpäivä, aknidõ restauriirmisõ opipäivi jm.

Mi käsitüümeistridõ asju sai osta’ Setomaal ja kavvõmbah. Leelopäävä ja kuningapäävä laadol oll´ väläh pall´o hüvvä seto kraami, võidsõ osta’ seto rõivit ja muud näpotüüd. Timahava käüti ütehkuuh ka Talinah märdilaadol ja müüdi kraami „Obinitsa“ etendüste aigu. Peterburih seto päivil opati näpotüü- ja söögitegemist, peeti ettekandit käsitüüst ja pakuti ka veitkene kraami müügist.

Suurõmbast kamandamisõst Käsitüü Kogol oll´ ettevõtlusfoorumi kõrraldaminõ. Mi meistri’ näütsi’ tõisilõ ummi tüütarri ja päiv otsa kõnõldi käsitüüettevõtlusõ võimaluisist.

Timahava ommava’ Käsitüü Kogoga liitunu vahtsõ’ tegijä’: Ivaski Urve, Parijõe Ahti Sujur ja Urmi Evelini Hurmart, mõnõ’ vana’ olija’ ommava’ hinnäst kuuhtüüst ka taandanu. Miktämäe naase’ võtva’ viil huugu kampa lüümisõl. Oodami õks vahtsit käsitüühuvilisi üteh tulõma ja vannolõ olijilõ toest olõma.

Vahtsõst aastakast om plaanih mitmit uusi projekte. Mõnõ ao pärast om kuulda’, kas ka käüki lätt. Kuuhtüüd disaini alal säämi ungarlastõ ja Krimmi tatarlastõga, tuutõarõndust ja ütist kaubamüüki Räpinä ja Orava võrokõstõga. Kimmähe alostami seto rahvarõivaraamadu kokkosäädmist, kõrraldami seto pitsi päivi ja kostipäävä pernaisilõ söögioppuisi.

Vahtsõl aastakal olkõ’ õks jälki kipõ’ käsitüüle, naase’ nopõ’ näpotüüle.
Hüvvi pühhi ja hüvvä üteh kamandamist!

Kala Ingrit
Seto Käsitüü Kogo vedosnik