Säidsekümmend setot Karilatsi moro pääl (0)

Puulpühä, 6. juunil oll Karilatsi Talorahvamuusiumi moro pääle kogonõnu’ pia säidsekümmend setot üle Eestimaa. Rahvast tull Talinast, Kohilast, Jõgõvamaalt ja Tartomaalt, Võro- ja Põlvamaalt. 

Kokkotulnu’ setokõisi tulli’ tervütämä Setomaa ülebsootska Laaneotsa Annela ja Setomaa Valdu Liidu juhatusõ esimiis Timmo Margus.

Kõgõpäält kõnõli’ Põlva Seto Seldsi juhatusõ esimiis Ristimäe Raivo ja juhatusõ liigõh Rahasepä Maria. Seto seldsi nimel tennäs Roht Svetlana minnu Petseremaa setokõisi kokkohõikamisõ iist, and üle ummamuudu setoteemalitsõ maali.

Mi lauli ütehkuuh seto hümni, lipp oll üles nõstõt ja saina pääle kinnitet Setomaa kaardi pääle sai nüüpnõglaga’ ar’ märki’ uma kodokülä kotusõ. Külälisi raamaduhe kirot õga ineminõ uma nime, elokotusõ, sünnükotusõ ja kontakti’.
S´oo voori oll viiedät kõrda Petseremaa setokõisil kokko saia’. Edimäne oll 4. juunil 2011 Intsikurmuh. Tuukõrd sai mi kokko Põlva innidse turuplatsi pääl ja ütehkuuh lätsimi Intsikurmu läbi liina seto lipuga’. Inemisi oll kokko korjunu’ üle saa. Tulti perridõga’, ummi latsi ja latsõlatsiga’. Hüvvä miilt tege, ku tulõva’ väiko’ latsõ’ ja noorõ’ nägevä’ seto kombit, kuuldva’ laulu, saava’ maitsa’ seto süüki. Järepääl hoitminõ om tähtsä, õt kuis muido saat perändkultuuri edesi anda’. Talinah kõrraldadas mihklipäivä, a mi kõrralda keväjä suvstõpühä kirmast vai setokõisi kokkosaamist.
S´ookõrd kutsimi külälisi ka’: Narva Eesti Maja lauluseldsi ja Udmurdimaalt peri noorõ’, kiä’ opva’ ja eläse’ Tartoh.
Seto söögis oll suulliim vai külmsupp vai okroška, mia kõlbas väiga’ höste suvitsõl aol süvvä’. Süüke oll hulga, õgaüts oll midägi’ üteh toonu’. Seto’ tulõ-õi kunagi’ palja käega’, sääne om kommõh.

Ku kõtu’ tävve’, sis võti’ mehe’ laulu „Vel´o’“ üles. Lauli’ ka’ naase’, tsõõripüüräh sai’ kõik, kiä’ tahtsõ’, üteh olla’.
Õt kokkosaaminõ olõs huvtavap, sis oll vällä märgit mõistatuisi võistlus. Kuvvõst võistkunnast kõgõ inäp punktõ korssi’ Tsibihärbläse’. Ma kõrraldi mänga ka’: miihile oll luvva kavvõndõhe hiitminõ ja naisi jaost langa kerräkeriminõ ao pääle.

Põlva Seto Seldsi asutamisõst saa jo kümme aastakka. Ku mul kümne aastaga iist tull mõtõh Põlvahe Seto Selts tetä’, sis Vananurmõ Ilmar, kiä oll tuudaiga Setomaa aolehe toimõtaja, toet mu õka mõtõht. Ärgüt Setomaa lehte artiklit kirotamma, õt seto’, saagõ’ kokko ütstõõsõga’.

Vaia oll kümmet asutajaliigõht, õt selts aamõtligult rigistriiri’. Kõikaig tull silmä’ ja kõrva’ vallalõ hoita’, õt lövväsi’ seltsi setokõisi. Juhusõ pääle löüse ka’ nuuri, kinkõl olõ-õi seto juuri, a näile meelüs seto laul ja kultuur.
Seldsih om naisi leelopark Ilolinõ, miihipark Vel´o’, kedä ma olõ juhendanu’ pia säidse aastat. Õgal as´al om alostus ja lõpp, nii sis otsusti juhtmisõ üle anda’. Mullõgi kulusi’ ar’ määnegi’ aig uma tervüse praavtamisõ jaost ja õt veid´ogi’ puhada’ tegemisist, juhtmisist.

Seldsi mano om tekkünü’ vahtsõnõ koor Madara. Põlvah om MTÜ Hõpõhelme Põlva nuuri leelokoor Ilotsõõr, ma olõ tuu kokkohõikaja, juhendaja. Koorih omma’ noorõ’ naase’, kõigil olõ-õi seto juuri, a näile meelüs seto leelo, kombõ’, kultuur, kanda’ uhkit seto rõivit, k´avvu’ seto kultuuriüritüisil. Koori tsiht oll naada’ laulma vanalaadilitsi seto laula. Ma olõ k´aunu’ muusiumih otsmah vanõbit salvõstuisi. Mullõ meelüse’ nuu’ laulu’, midä laul mu meheimä mineväl saandil.

Minevä aastaga kõrrald Ilotsõõr kats avalikku seto üritüist. Talvõl oll maaselidsa iloõdak ja sügüse umakultuuripäiv. Mi tutvusti seto süüke, tähtpäivi, opati seto tandsa, tuu jaost kutsi tandsja’ Miktämäelt. Mõlõba’ üritüse’ olli’ hotellih Pesä, restoranih pakti seto süüke viil terve kuu.

Tenosõna’ kõigilõ!
Saami’ kokko järgmätsel aastagal Intsikurmuh.

Rahasepä Maria