Võistluisi juhõndi´

KARGUSÕ JA KASATSKI VÕIKI TANDSMINÕ

Valitas illoś, tark ja kõrralitsõlt rõivih seto esindäja. Kõgõ paremb kargusõkargaja ja kasatskikargaja:
■ mõist seto muudu tandsi’;
■ om seto muudu olõkiga ja kihähoitmisõga;
■ mõist hinnäst pillimehe muusiga perrä säädä’ ja tandsi’;
■ kargusõkargaja tands tsõõrih tõisiga ütehkuuh ja edvistämäldä’ kaejidõ jaost.
Ku om veidembä ku kats võistlõjat, sis hindamist tulõ-i. Ku kargust kargama pand kirja inämb ku kümme tandsjat, sis hinnatas naisi kargust eräle katõh kategooriah: vanikpää’ ja linikpää’. Hindamistargol om õigus jättä’ avvuhind vällä andmalda’, ku olõ-i tingimuisi täüdet. Hindamistargol om õigus vällä anda’ erälde kitmisõ aupapõr, ku tuu om ar’ põhjõndõt.

Päävedosnik: Keerpalu Marika, tel 528 9928

PILLIMIIHI VÕISTLUS

Võistlusõl sorditas vällä üts kuninga pillimiis. Mängi’ võit libliklõõtsa, Teppo tüüpi lõõtsa, karmoškat, kiigat, (seto helühannaga) kannõlt. Midä kaetas ja kullõldas:
■ tulõ mängi’ üts seto kargus ni üts vabalt valit tandsolugu, midä mängitäs Setomaal;
■ pillimäng õkva kisk tandsma;
■ pilli perrä om hüä ja kerge seto muudu tandsi’ ja lugu om mängit kimmä taktiga;
■ pillimiis piät tiidmä ja mõistma tuust ka rahvalõ kõnõlda’, mäntsest nulgast lugu peri om vai kinkõ/minkõ perrä tä om tuu ar’ opnu.
Hindamistargol om õigus jättä’ avvuhind vällä andmalda’, ku olõ-i śood kõrda täüdet. Niisamatõ om näil õigus vällä anda’ lisaavvuhindu/tiitlit.

Vedosnik: Andresoni Sigre, tel 507 1029; sigre@setomaa.ee

KIMMÄS SETO KEELE KÕNÕLÕJA

Seto Kuningriigi kimmäs seto keele kõnõlõja om tuu, kiä mõist seto keeleh väega höste kõnõlda’. Tuu jaost tulõ rahva iih ette kanda’ jutt. Jutu ettekandmisõst om aigu koon’ 3 minodit. Jutt või olla’ nal´alinõ, elolinõ vai tuust, minkõst kõnõlõja eis’ kõnõlda’ taht. Ku aig üle lätt, sis käänetäs helü maaha ja lava pääle tulõ vahtsõnõ kõnõlõja.
Kõnõlõja man hinnatas:
■ õt jutu seeh olõsi-i kiräkeelitsit sõnno;
■ seto sõnno käändmist-püürdmist ja keelekumu välläkuuldumist.
Hindaja’ võiva’ vällä anda’ ka eriavvuhindu.

Vedosnik: Rahasepä Rainer, tel 515 3161

SETO KUNINGRIIGI PILDISTÄJÄ VÄLLÄSORTMINÕ

Teema: seto süük
Śool aastagal oodõtas hüvvi pilte seto söögist. Kõlbasõ’ kõik pildi’, mis omma’ seotu seto söögiga. Võistlusõ mõtõh om sorti’ vällä kõgõ parep kuningriigi pildistäjä. Võistõlda’ võiva’ kõik, vällä arvatu hindamiskomisjoni liikmõ’. Pilte man hinnatas nii tehnilist ku kunstilist puult, kaetas pildi seto muudu olõkit ja elolisust.
Õga võistlõja või saata’ kooni’ 3 pilti. Esitä’ võit ütskõik mäntse aparaadiga tett pildi. Pilt või olla’ kas mustvalgõ vai värmilinõ. Saata’ tohi-i pilte, mia’ omma’ olnu’ mõnõh tõõsõh võistlusõh. Saadõtas JPG/JPEG pildifail, minkõ suurus piat olõma vähäbält 2MB.
Pildi man piat olõma päälkiri, pildistäjä nimi ja kontakti võtmisõ andmõ’, a ka pildistämisõ aig ja kotus. Pilte tüütlemisõ man tulõ arvõsta’ hüvvä tavva ja õt tuu, midä pildistedi, jääsi’ loomulik. Pildistäjä vastutas hindä ja pilte andmidõ õigsusõ iist ja tuu iist, õt tä om eis’ võistlusõlõ esitet pildi ülesvõtja ehk pildistäjä.
Pilte kaes ja uma arvamusõ and hindamiskomisjon, kiä sort vällä 15 pilti, mia’ pandas kuningriigipääväl rahvalõ kaemisõs ni kotusõpääl hindamisõs.
Hindamiskomisjonilõ ja rahvalõ kõgõ inäp miildünü pilt om võidupilt. Kuningriigi pildistäjä hõigatas vällä 2. augustil Seto Kuningriigipääväl Saatserinnah.
Võistlusõlõ saadõt pildi’ jäävä’ MTÜ Seto Kuningriigi Kroonikogolõ. Kroonikogol om õigus võistlusõl olnu’ pilte edespidi ilma rahalda’ kasuta’, a kasutamisõl lisatas mano pildistäjä nimi.
Pildi’ saata’ e-kiräga aadressilõ: kersti. virro@gmail.com. Pilte oodami kooni’ 18. juulini 2025.
Vedosnik: Virro Kersti, tel 517 1451, kersti.virro@gmail.com

NÄPOTÜÜ VÕISTLUS

Teema: kinda’
Innevanastõ oll´ Setomaal kindil õks suur tähendüs saaju ja matusidõ aigu. Kõnõldas, õt peigmiis istsõ pulmalavvahki, kinda’ käeh. Olliva’ tüü tegemisõ, nii-üldä’ pidämisõ kinda’ ni ilosa’ kerkoh käümisõ kinda’. Setomaal on koetu ka sõrmkindit, a timahava oodami konkursilõ kiŕolisi labakindit (kulakkindit).
Kuninga näpotüü meistrist saa tuu, kiä om kotoh valms tennü kõkõ ilosamba’ ja kõkõ inämbä seto muudu labakinda’. Konkursil hinnatas, ku kõrdapite ja ku kimmält om koetu, kaetas seto muudu olõkit ja hinnatas värme, kirja, alostust ni lõpõtust. Maailm om vallalõ ja veiga rassõ omgi üldä’, õt śoo om seto kindakiri ja śoo olõ-i. A tuud seto muudu kinda olõkit tundva’ õks tiidjä’ ar’.
Viimäne aig kindidõ tuumisõst vai saatmisõst üteh nimesildiga om 1. august 2025 Seto Käsitüü Kogo kontorihe Verskah. Töid võetas vasta ka kuningriigipäävä hummogu infotelgih kooni’ kellä 11.
Töid hinnatas ja hindaja’ kuts kokko Seto Käsitüü Kogo. Kõigist konkursilõ esitet töiest säetäs vällänäütüs. Rahva hääletüse tulõmusõna hõigatas vällä ka rahva meelest kõkõ ilosamba’ kinda’ kudanu näpotüülinõ. Vällä andas kats avvuhinda: rahva miildümine ja žürii paremp.

Päävedosnik: Kala Ingrit, tel 512 0659

SÜÜKE JA JUUKÕ VÕISTLUS

SÕIR

Võistlusõlõ tuud sõir piät olõma tett värskist kraamist (piim, kohopiim, või, muna’, suul). Sõir piät olõma ilosa värmiga, höste kuuh püüsümä ja hüä värski lõhnaga. Sõira seeh või tarvtada’ lisandina õnnõ küümnit. Sõira võtva’ vasta komisjoni liikmõ’, kiä’ kintäse’, kas sõir sobis võistlusõ reeglidõga.

LEIB

Leib om kullanõ pala, minkõlõ anti suud, ku käärokõnõ maaha sattõ. Leib piät olõma juurõtisõga tett, hüä maigo ja lõhnaga, ilosa vällänägemisõga, päält ille ja pakso koorõga. Pääle jauha või leevä sisse panda’ õnnõ nuid lisandit, midä om võimalik kasvatada’ Setomaal. Leevä võtva’ vasta komisjoni liikmõ’, kiä’ kintäse’, kas leib sobis võistlusõ reeglidõga.

TATIPIIRAK

Võistlusõlõ oodami tatipiirakut, minkõ põhi om sepäga tett. Piirak või olla’ kinnine vai päält lahtinõ. Olulinõ om puhas seene maik, võimaligult vähäste lisandidõga. Piirak piät höste kuuh püüsümä, õt olõs lihtsa lõigada’ ja õt näesi’ illoś vällä. Seene’ piät olõma koŕat Setomaa mõtsust.

Vedosnik: Turvase Evelin, tel 53407874

HANŚA, OL’, TAAR ja VERREV VIIN

Setomaal paktas umatett kraami õks nõnnopite. Tuuperäst piät joogi’, mia’ kuningriigi võistlusõlõ rahvalõ maitsmisõst tuvvas, olõma hüä maigoga, vannamuudu ja kõrdapite tett.
Kõrralinõ hanśa piät õks vana viisi perrä olõma mito kõrda läbi aet ja tohi-i olla’ vähämb ku 50 kraati kangõ. Õigõ hanśa om rüäst tett ja väega avvu seeh omma’ nuu’ meistre’, kiä’ viil eis’ ka rükä kasvatasõ’. Vannamuudu tett hanśa om klaar ja ilma värmildä’ ni hüä lõhnaga, minkperrä saat õkva üldä’, õt kraam om paslik ja õigõ. Hüvvä hanśat piät vällänägemisõ perrä jo tahtma ja maigo perrä hüäst kitmä. Vastavõtja piät kõrraga ar’ maitsma hanśa ni ütlemä tuujalõ, kas juuk lätt Seto Kuningriigi meistri võistusõlõ vai jääs rahvalõ maitsa’.
Ol’ om üväst tett juuk. Olõ-i mesimakõ. Parasjako käünü. Tohi-i olla’ vesine. Piät olõma hüä juvva’ ja tegemä meele kergest. Taar olõ-i kali. Innevanastõ tetti õgah taloh ummamuudu taari. Taar om leevä vai leeväkoorikidõ vai muud muudu jauhhõlõ pääle pant vii hapnõmisõ perrä saad hapu juuk.
Taar piät olõma ilosa värmi ja hüä lõhnaga, tegijä piät ar’ seletämä taari tegemisõ. Taar piät olõma kõrralitsõlt aigupite ar’ hapanu ja piät olõma juujalõ meelelinõ.
Verrev viin om kodoaia vai mõtsamaŕakõistõst õigõhõ kääritet juuk, miä olõ-i ätkest last. Õga meistri tege ummamuudu, tuuperäst tulõ eis’ pruumma tulla’, õt meistri vällä sorti’.

Vedosnik: Toomiste Lauri, tel 5243876

Võistlõmma tuud kraami iist mastas rahha:
sõir 15 €/kg, piirak 8 €/kg, leib 4 €/kg, hanśa 8 €/l, ol’ 2 €/l, taar 2 €/l, verrev viin 5 €/l. Kraami piät olõma: sõira 2 kg, piirakut 2 kg, leibä (vannamuudu) 2 kg, hanśat 1 liitri (teräviläst tett ja üle 50 kraadi), olt 2 liitrit, taari 2 liitrit, verevät viina 2 liitrit.
■ Kraami või tuvva’ ka’ inämbä ja sis tuu pandas kuningalavva pääle kostist.
■ Kraamõ vastavõtminõ kellä 10–11. Kraami vastavõtmisõ man om ka MTÜ Seto Köögi esindäja.
■ Hindaja’ (söögi- ja joogimaitsja’) andva’ uma helü, a tuu iist tulõ massa’: sõir 5 €, piirak 3 €, leib 3 €, hanśa 5 €, taar/ol’ 4 € ja verrev viin 4 €.
■ Kõkõ inämbä helli saanu’ söögi- ja joogitegijä’ omma’ rahva lemmiku’.
■ Śooaaśtagatsõ’ sõira-, leevä-, hanśa-, ollõ- ja taarimeistri’ sortva’ vällä seto söögi ja joogi aśatundja’. Verevä viina ja piiragumeistri selgus rahva helüde perrä.
■ Juukõ ja süüke pruumminõ lõpõs, ku üte inemisõ tuud kraam saa otsa. Perräjäänü’ joogi’ ja söögi’ läävä’ kuningalauda kostist.

VÄGÜMEHE VÄLLÄSORTMINÕ

Setomaa kõgõ kõvõmba mehe välläsortmisõ man kaetas joudu, kimmäst kätt ja terävät nutti.
Kihäkaal om õnnõ üts ja piä-i olõma Setomaa juurõ’, om vaia julgõt päälenakkamist.
Kõgõst kõnõldas täpsembält võistlõmisõ man. Kõgõ kõvõmba vägümehe jaost olõ-i tähtsä’ punkti’, tä om tõisist üle, ku om õigõl aol õigõh kotusõh.

Päävedosnik: Laatsi Leivo

SÕNOLISÕ VÕISTLUS

Timahava om Seto Kunigriigih jalki sõnolistõ võistlus! Õks tuu jaost, et nuu’ naase’ ja mehe’, kia mõistva’ seto laulu tetä’, saanu’ hindä vahtsit laula üteh kooriga ette kanda’.
Śooh Setomaa leheh annami kõigilõ tiidä’ kats laulu teematsõõri, et kõigil olõs aigu sõnno märki! (Muidoki võit laulda’ ka ilma ettevalmistamalda’, nigu lauluimä’ lauliva’).

Seto kirä’
Kodo piiri pääl

Kunigriigih pääväl tõmbas ülembsootśka kõigi nätteh katõst teemast vällä üte – tuu om timahavadsõ sõnolisõ võistlusõ teema.

Võistlõma oodami kõiki naisi ja miihi, kiä mõistva’ seto laulu tetä’.
Sõnoliisi võistlus om seto leelo võistlus, hinnatas laulu, miä om ette ant teema perrä tettü vanna muudu seto laul (salmikõisi, riimilist laulu ja pille siiä võistlusõlõ oodõta-i).
Laul piat olõma ette ant teema perrä.
Laulu kand ette tuu, kia sõna’ om vällä märknü.
Paprõ päält maaha laulda’ tohi-i.
Laul tohi-i olla’ pikep ku 6 minotit.
Sõnoliisi võistlus olõ-i koorõ võistlus, tuu tähendäs, õt hinnata-i koori, a sõnolisõ laulu ja sõnno. Muidoki om tähtsä, õt sõnolinõ laulnu nii, õt kooril kerge perrä olnu üldä’. Ütest koorist või võistlõma tulla’ mitmit sõnoliisi!

Päävedosnik: Kalkuni Andreas, andreas@folklore.ee