Turism lätt huuga’ edesi (0)

Pärnoja Ülle, Setomaa Turism

Süküs om turismih kokkovõttidõ ja planiirmisi aig. Mi kae üle suvitsit tegemisi, säe kokko järgmäist huuaigu ja kiroda pikepä ao pääle vahtsit projekte.

Meil oll MTÜ liikmidõga’ kokkovõttidõ tegemisõ tsõõriklaud oktoobrih. S´ookõrd võtt külälisi vasta Toomõmäe talo pereh vahtsõh restoranih Maagõkõnõ. Olgu’ siih ült: ku sa viil olõ-õi sinnä’ joudnu’, sis võta’ kindlahe tuu plaani ja mine’ sinnä’ ummi sõpruga’! Tsõõriklavvah tulõtimi hüä sõnaga’ miilde suvvõ – oll uhkõ Seto Kunigriik ja Obinitsa etendüs, käve’ aokiränigu’, kostipäiv meelüt katõl pääväl rahvast s´ooho kanti jne.

Mi tutvusti ka’ MTÜ sügüsetsi tegemisi ja plaanõ. S´ooh sügüseh om vaest inäbä töid ku minevaastagatsõh. Oktoobrih võti mi vasta Valgõvinne reisikõrraldaiji. Nä olli’ huvilitsõ’, a paistus, õt valgõvindläisi meele õks väiga’ pia jovva-ai. Näil sääl raharehvorm om ello tennü’ keerulitsõbast.

6.-7. detsembril om Verskah turismikonverents kuuhtüüh Lõunõ-Eesti Turismiga’. Edimäist kõrda om kokkosaaminõ katõpääväne. Edimätsel pääväl sõidõtas müüda Setomaad – Verskast läbi Saatserinna Obinitsa. Tõõsõl pääväl om konverents, koh päävä tõõsõh poolõh omma’ Setomaa etteastõ’. Mi looda, õt tuus aos mi meelüdä siiä’ ka’ Talina ja Tarto reisikõrraldaiji – nimä’ toova’ meele tulõviguh gruppõ, ka’ vällämaalt.

Pikäaolisi projektiplaanõ om mitmit. Näütüses jaanuarih mi ooda vastust Est-Lat programmi taotlusõlõ. Ku vastus om positiivnõ, sis mitmõ partneri kuuhtüüh tii mi mitmit arõndusõ ja turundusõ tegevüisi kol’ aastakka. Setomaalt om üteh haarõt viil Seto Instituut ni Verska ja Meremäe vald.
2017. aastagal taha mi alosta’ katõ pikebä projektiga’. Üts nuist om saanu’ rahastusõ Piiriveere Liidri 2016 edimätsest voorust, tõõnõ saa vaest tõõsõst voorust. Edimäne nuist om Setomaa giide koolitusprogramm, sinnä’ tahtjidõ avalduisi nakami aastaga lõpuh jo’ kokko kogoma. Tõõnõ projekt om kostipäävä kohvigu’, a kõnõlõmi tuust täpsebält ja pikebält sis, ku rahastus olõmah.

Mi tegemisi mõotasõ’ ka’ naabridõ tegemisõ’. Näütüses mi lüü kampa ka’ Peipsimaa võrgustigu tegemisih kooni’ 2019. aastagani’, selle õt Piiriveere Liidri üldkuuholõk kitt hüäs Peipsimaa kuuhtüüprojekti. Tuu seeh mi olõ kuuh Tourestil ja välismessel, võta kuuh vasta aokiränikkõ jne. Näütüses 1. detsembril mi tutvusta Peipsimaa ja Setomaa tegemisi Pihkvah Kaubandus-Tüüstüskuah. Mõni päiv tagasi sai selges, õt 2017. aastagal om Peipsimaa Eesti maigu söögiala. Peipsimaa süüki om sis nätä’, tetäs söögikooltuisi. Kindlahe mõotas tuu ka’ meid, mi saa nuist mõnõh olla’ üteh.

Seto Külävüül tetäs huugsalt arõnduisi. Novembrih pandas nulgakivi Andri-Peedo vahtsõlõ tuutmishuunõlõ, sääl om mõtõld ka’ turismigruppõ vastavõtmisõ võimaluisilõ. Järgmätses suvõs pias Vastseliina linnusõ mano tulõma palvõränduridõ maja. Kindlahe tulõ säält kohalikku turismiello suuri tegemisi viilgi’. Vallalõ lännü’ Leader vooru’ andva’ tuu jaost hüvvi võimaluisi – ettevõtja’, haarkõ’ kõigist võimaluisist kinni!