Verska orienteerumisklubi Peko pidi 25. sünnüpäivä (0)

Verska orienteerumisklubi Peko pidi 25. sünnüpäivä

Zuppingu Sirli

Novembrikuu 7. pääväl tähist Verska OK Peko uma 25. tegevusaastakka.Oll illos lustilinõ ja rõõmsa sünnüpäiv, mia naas pääle mõttõtalosõga’ Verska kultuurimajah, läts edesi sportligult Verhulitsah ja lõpp oll pido ligult sanatooriumi Lahe kohvkuh. Kaemõ’ kõrrast, kuis OK Peko pääle naas ja minkaga’ klubi parhilla’ tegeles.

Orienteerumisklubi Peko alostus

Orienteeruminõ om spordiala, midä tetäs õgal aastaaol, koh kaardi ja kompassi abil k´audas läbi maastigu ja kaardi pääle märgit kontrollpunkti’. S´oo spordialaga’ olõ-õi kunagi’ ilda pääle naada’. Õgas mõtsah juuskmah k´auda-ai õnnõ tulõmusõ peräst, a õks uma tervüse ja hüvvi tunnõhtõ peräst. Om ült, õt orienteeruminõ nakas külge pia kõigilõ, selle õt s´oo om meelütäv.

Eestimaal om sportligu orienteerumisõga’ tegeld jo aastakümnit, näütüses 1959. aastagast peetäs Eesti meistrivõistluisi. Klubisit naati tegemä 1978. aastagast, ku luudi Tarto OK Ilves. Orienteerujidõ arv Eestih om ao joosul hüä suur olnu’ ja tähtsäbidõ keskuisi mano om luud umast aost sporditegijidõ klubi’. Verska OK Peko naas pääle 6. oktoobril 1990, ku oll selges saanu’, õt Kagu-Eestih om illos ja huvtav maastik, a suurõl hulgal orienteerujil olõ-õi umma klupi. Suur jago edimätsist klubi liikmist omma’ peri Setomaalt ja lähkobidõst kotussist.

Parhilla’ om OK Pekoh 80 liigõht, näide siäh om nii lastõaiaiälitsi, koolilatsi, tudengit ku ka’ õgah iäh suuri inemisi. Klubi tegevuisi om päämätselt kats – võistluisil k´auminõ ja võistluisi kõrraldaminõ. Sinnä’ vaihõlõ mahas viil pall´o tõisi ütitsit tegevuisi, näütüses treeniglaagri’, kultuuriüritüse’ ja vaba ao müüdäsaatminõ. Inäp jago klubi liikmist tegeles orienteerumisõga’ tervüse-, harrastusõ- vai tippspordi tasõmõl, a tetäs ka’ erinevvi kestvusspordialasit. Hulga võistluisi om Eestih, a väiga’ mitmõ’ rahvusvahelitsõ’ võistlusõ’ omma’ vällämaal.

Kuis OK Peko hindäle nime sai?

OK Peko nimi tulõ seto mütoloogiast, koh Pekot peetäs õnnõtuujas ja viläsaagi kaitsjas. Tuu joulinõ nimi sorditi vällä klubi asutamiskuuholõkil. Klubi president Kudre Raul om ülnü’, õt otsiti säänest nimme, läbi minkõ olõs tunda’ nii mõttõlidsõlt ku geograahvilidsõlt Verskat. Tiidmisõst, õt OK Peko asutamiaastagal olõ-õs viil vällä tulnu’ Vabarna Anne luud eeposõ „Peko“ raamatut, tuu ilmu 5 aastakka ildappa. A Pekost oll jo kirotõt (nt Paul Lehestigu kodoluuraamat). Pekot ku seto kunigat arvati kõgõ loohkabast ristiesäst klubilõ. OK Peko edimätses presidendis valiti Toivo Toomas, kiä tougas klubi suurõ huuga’ k´auma.

OK Peko pakk kõigilõ „umma“

OK Peko kõrraldas päämätselt orienteerumisvõistluisi, a sama tähtsä’ omma’ ka’ juuskmisõ-, suusatamisõ- ja rattavõistlusõ’. Traditsioonilidsõlt kõrraldas OK Peko õgal aastagal rahvusvahelidsõ orienteerumisjoosu Peko Kevväi ja rattamaratoni Verska GP. Pääle nuidõ kõrraldas siih erinevvi spordisar´a võistluisi, näütüses ümbre Verska järve juusku, Verska rattasõitu, orienteerumispääväkit, suusaetappõ ja Verska suusasõitu. Pekoka’ omma’ kõrda saanu’ ka’ tõistsagamatsi sündmüisi kõrraldamisõga’, näütüses nuuri jaost kõrraldõt üritüse’ ja elämüsmängu’. Kõigi üritüisi kõrraldamisõl kogonõdas kokko nii ku tüümehiläse’ pesäh ja kõik klubi liikmõ’ saava’ võimalusõ tuuhu panusta’.

Klubi sünnüpääväl olnu’ mõttõtalosõl nõssi üles mõttõlang: OK Peko = kõiki ühendäv harrastus = järepidevüs = traditsiooni’ = hüä’ tundõ’ = üteh-olõmisõ-tunnõh = suur pereh = köüdüs kodokotussõga’. Tuu mõttõlang ommõgi’ OK Peko populaarsusõ põhjusõs, midä om rassõ üte lausõ sisse panda’. Kokkovõttõh – OK Peko pakk õgaütele umma.

Edespidi OK Peko lätt samma tiid edesi: kõrraldadas võistluisi ja k´audas võistluisil, paktas nii noorilõ ku ka’ vanõbilõ inemisilõ võimalust orienteerumisõga’ tegeldä’. Klubi president Kudre Raul om uma pilgu kül’ arõngut täüs tulõvikku käändnü’, a kinnitäs: „Tähtsä om ka’ edespidi hal´as mõttõviis, sportlik eloviis ja orienteerumisõ ku harrastusõ propagiirminõ ja huvilisi kokko kogominõ.“

OK Peko veerändsaandi tegevusaastaga tähistämine

Huuaja lõpõtamisõ tähe all om OK Peko õga sügüs uma’ liikmõ’ kokko kutsnu’. Tuu om aig, ku talvõ- ja suvõao võistlusõ’ omma’ läbi saanu’ ja tetäs plaanõ järgmätses aastagas.

S´ool aastagal oll huuaja lõpõtamisõl klubi 25. sünnüpäiv, mia naas Verska kultuurikeskusõh pääle mõttõtalosõga’ „Kohes läät, Verska OK Peko?“. Tull vällä, õt nuuri ja vanõbidõ klubi liikmidõ mõttih ja mõttidõ edesiarõndusih om väigagi’ pall´o ütist, a ka’ julgustavalt erinevvä. Edesi liiguti Verhulitsahe, koh OK Peko maja lähkoh pedäjämõtsah oll põnnõv ja väiga’ tihedä konkurentsiga’ võistkundõvaihõlinõ tiatõjuusk. Õdagu hämoh olti sannah ja süüdi, õt kogoda’ joudu päävä pidoligubas osas.

Huuao pidolik lõpõtaminõ ja sünnüpäävätordi süüminõ oll kododsõh Lahe kohvkuh, koh pekokit uut uhkõ vastavõtulaud. Sääl oll ka’ üldkuuholõk, tetti uhkõ avvustaminõ, pruumti ummi tiidmisi viktoriinih, tandsti ja aeti juttu üüni vällä.